പിറന്നാൾ തുമ്പി pirannal Thumbi
09 April 2026 | Poetry
മുത്തേ പൊൻമണി തത്തേ,
നിനക്കുണ്ണാനിലക്കുമ്പിൾ തേൻ.
ഓമനേ നീയെൻ പ്രിയത്തിൽ പൂത്തു, ഹൃദയവായ്പിൽ വളർന്നു.
കാൽത്തളത്താളത്തിൽ കിലുങ്ങിച്ചിരിച്ചോമനേ, നീ മറയുന്നു ദൂരെ....
സ്വപ്നവർണ്ണങ്ങളിൽ നിൻ കിളികൊഞ്ചലെന്നിലുണർത്തുന്നു ജീവതാളം.
നീ ചേർന്നിരുന്ന പകലിന്റെ ജന്മപുണ്യം, പൂവേ,
നീ മറന്നോടിക്കളിച്ചൊരു പുഞ്ചിരിമുറ്റം എന്നുമെന്നിൽ തെളിഞ്ഞുനിൽക്കുന്നു.
പുതുവഴി പിറക്കുന്നു, പിറന്നാൾ പ്രിയമെങ്കിലും നീ കരുതുക,
ദുർഘടവഴികളറിഞ്ഞേ പോവുക.
പൂതനമാർ വിഷം നിറച്ച മുലയുമായി, അമൃതേകി ഇറങ്ങും കാലം...
കനിവേകിത്തരും ജാഗ്രതയ്ക്കപ്പുറം കടക്കാതിരിക്കുക,
അമ്മയാകുന്നൊരുണ്മയെ ചേർത്തുപിടിക്കുക.
വഴികളിലെന്തെന്തു തിമിർപ്പുകൾ!
അറിയാതെയുടഞ്ഞുപോകുന്ന സ്വാർത്ഥതതൻ പടുകുഴിയിൽ വീഴാതിരിക്കുക.
സ്നേഹകാരുണ്യക്കടലാണു ലോകമെന്ന് നീ ഓർത്തു പോകുക പൈതലേ...
ജാതിയില്ല, മതവുമില്ല, വ്യക്തിബന്ധങ്ങളും-
രക്തഭാവങ്ങളും മാത്രമല്ലീ ഉലകിൽ.
ഉറുമ്പിനുപോലുമുണ്ടവകാശവാദങ്ങൾ.
ജീവന്റെ തുടിപ്പും പേറി നാം നടക്കുന്നൊടുവിൽ,
കിതപ്പകറ്റുന്നവന്റെ അജ്ഞാതനാമം - മനുഷ്യൻ.
സ്നേഹിക്കുക, തെല്ലുമേ സന്ദേഹമറിയാതെ,
സകലലോകത്തിൻ ദുഷിച്ച കെട്ടുപാടുകൾ പൊട്ടിച്ചെറിയുക.
ഒരു ചെമ്പനീർപ്പൂവുപോലെ മൃദുലമാം നിൻ കഥയിൽ,
കാവലിരിക്കുന്ന എൻ ഗർഭപാത്രം.
ആശംസകൾ നിനക്ക്, ആശംസകൾ!
ആർദ്രമാം പകലിന്റെ, വളരുമായുസ്സിന്റെ...
പ്രണയം നീർക്കുമിളപോലെ എൻ തുളുമ്പുന്ന-
മാതൃവാത്സല്യത്തിന്റെ എണ്ണിയാൽത്തീരാത്തൊരാശംസകൾ
അയിഷ ഹസീന
കവി, എഴുത്തുകാരി