മരം

സുരേഷ് ശർമ, മധ്യപ്രദേശിലെ മൻസ സ്വദേശി. ശ്രേഷ്ഠ ഹിന്ദി കവിത സമ്മാനം നേടിയിട്ടുണ്ട്. പത്രങ്ങളിലും ആനുകാലികങ്ങളിലും കവിതകൾ എഴുതാറുണ്ട്.

◼️

മരം

മരം

ഭൂമിയുടെ പുതപ്പും

മലയുടെ ഉടുപ്പുമാണ്.

മരം

മേഘത്തിന് ഭൂമിയോട്

നേരിട്ടുള്ള സന്ദേശമാകുന്നു.

മരമുണ്ടെങ്കിൽ

നദിയുണ്ട്, കിളിയുണ്ട്

കാടും മലയുമുണ്ട്.

മരമുണ്ടെങ്കിൽ

ജീവനും ഭാഷയും കവിതയുമുണ്ട്.

കവിതയിലെ മരം വസന്തത്തിന്റെ പരിഭാഷയാണ് .

മരമുണ്ടെങ്കിൽ

തടാകത്തിൽ നിന്നും കുടം നിറയും.

മരങ്ങളുണ്ടെങ്കിൽ

ഭൂമി മുഴുവൻ പച്ചയാകും മരം വെട്ടുന്നേരം

പുഴ വറ്റുകയായി

മല ഇടിഞ്ഞു താഴുകയായി.

മരം വെട്ടുന്നേരം

വന്ധ്യയായേയ്ക്കാവുന്ന

ഭൂമിയുടെ പ്രാർത്ഥന

മലയുടെ

ജാലകപ്പഴുതിലൂടെ പ്രതിധ്വനിയ്ക്കുകയായി.