സ്വാതന്ത്ര്യം

ഒറ്റുകാരെക്കൊണ്ട് യുദ്ധഭൂമി

നിറഞ്ഞിരിക്കുന്നു.

ഉരുകിയൊലിച്ച് ചിതറിക്കിടക്കുന്ന , കുഞ്ഞുനിലവിളികൾക്കിടയിലൂടെ,

മിസൈലുകൾ പൊട്ടിയൊഴുകുന്ന രക്തനദിയും കടന്ന്..

അതിർത്തികൾക്കപ്പുറമെത്താനുളള

അവസാനശ്രമം.

ദുരിതങ്ങളും പട്ടിണിയും വാരിപ്പുതച്ച് ,

കനൽപ്പാതയിലൂടെ കൂട്ടപ്പലായനം..

മുറിച്ചെടുത്ത വെളുത്ത ജനൽക്കർട്ടനും

സ്പ്രേപെയ്ന്റും കുട്ടികൾ

ഭാണ്ഡങ്ങളിൽ ഒളിപ്പിച്ചിട്ടുണ്ട്.

ചെന്നെത്തുന്നരാജ്യങ്ങളുടെ പതാകകൾ

നിർമിച്ച് അതിർത്തികൾ കടക്കാമെന്ന്

ആരോ പറഞ്ഞത്രെ!

സമാധാനത്തിൻ്റെ

വെളുത്തപതാകകൾ

ഇപ്പോൾ നിരർത്ഥകങ്ങളാണെന്നും.

ഉയിരുണങ്ങാത്തൊരലിവിൻ്റെ

കവിതകൾ ദൂരെയെവിടെയോ

ചിറകറ്റുവീണുകിടപ്പുണ്ട്.

അരികിൽ വറ്റിപ്പോകാതെ

നിലവിളികൾ നേർത്തൊഴുകുന്നു.

ഈ നഗരാവശിഷ്ടങ്ങൾ നാളെ

വിനോദ സഞ്ചാരകേന്ദ്രങ്ങളാകും.

ചരിത്രഭൂമിക കൗതുകമുള്ള

റസ്റ്റോറണ്ടുകളും !

അവിടെയും വ്യാപാര കേന്ദ്രങ്ങൾ

ലാഭം കൊയ്യും!

ആയുധങ്ങൾനൽകി ആരെല്ലാമോ മുളപ്പിച്ചെടുക്കുന്ന,

ഒരിക്കലും അവസാനിക്കാത്ത യുദ്ധങ്ങൾക്കായി

അവരുടെ പതാകകൾ ഇപ്പൊഴും

ഉയർന്നുകൊണ്ടേയിരിക്കുന്നു .

നമ്മൾ

സ്വാതന്ത്ര്യത്തിലേക്കുള്ളയാത്ര തുടരുകതന്നെയാണ്.

അകലെയെവിടെയോ

ഒരു മരുപ്പച്ച ഉണ്ടാവാമെന്ന

പ്രതീക്ഷയുടെ കൊടിയും

ചുമന്നുകൊണ്ട് !